ന്യൂഡല്ഹി: ഡല്ഹിയില് വീണ്ടും കൂട്ടബലാത്സംഗം. ഡല്ഹി കല്ക്കാജിയില് പതിനേഴുകാരിക്ക് നേരെയാണ് കൂട്ട ബലാത്സംഗം നടന്നത്. ഇന്നലെ വൈകീട്ട് ഏഴ് മണിയോടെയായിരുന്നു സംഭവം. പെണ്കുട്ടി ആണ്സുഹൃത്തിനൊപ്പം പാര്ക്കില് ഇരിക്കുമ്പോഴാണ് അക്രമികള് എത്തിയത്. പൊലീസ് ഉദ്യോഗസ്ഥരെന്ന് വ്യാജമായി പരിചയപ്പെടുത്തി പീഡിപ്പിക്കുകയായിരുന്നു എന്നാണ് പരാതി. അക്രമികള് ഭീഷണിപ്പെടുത്തിയെന്നും പെണ്കുട്ടിയുടെ പരാതിയില് പറയുന്നു.
പെണ്കുട്ടിയും ആണ് സുഹൃത്തും കല്ക്കാജിലെ ഒരു ക്ഷേത്രത്തില് സന്ദര്ശനത്തിന് ശേഷമായിരുന്നു പാര്ക്കിലേക്ക് പോയത്. ഇതിനിടെയാണ് ആക്രമണം ഉണ്ടായത്. രാത്രി 8.45-ഓടെയാണ് സംഭവത്തെക്കുറിച്ച് പിസിആര് സന്ദേശം പൊലീസിന് ലഭിക്കുന്നത്. അപ്പോള്ത്തന്നെ കല്ക്കാജി മന്ദിറിനും ഇസ്കോണ് ക്ഷേത്രത്തിനും ഇടയിലുള്ള പാര്ക്കിലേക്ക് പൊലീസ് സംഘം എത്തിയിരുന്നു. പെണ്കുട്ടിയെ വൈദ്യപരിശോധനയ്ക്ക് വിധേയയാക്കുകയും മൊഴി രേഖപ്പെടുത്തുകയും ചെയ്തു. പാര്ക്കിലെയും പരിസരപ്രദേശങ്ങളിലെയും സിസിടിവി ദൃശ്യങ്ങള് പൊലീസ് പരിശോധിച്ചു. 25നും 30നും ഇടയില് പ്രായമുള്ളവരാണ് പ്രതികള് എന്നാണ് പെണ്കുട്ടി നല്കിയിരിക്കുന്ന മൊഴി.
ഇതില് ഒരാളെ പൊലീസ് പിടകൂടിയിട്ടുണ്ട്. ഏറ്റുമുട്ടലിനും ചെറിയ തോതിലുള്ള വെടിവെപ്പിനും ഒടുവില് സാഹസികമായാണ് പ്രതി പിടിയിലായതെന്നാണ് പൊലീസ് അറിയിച്ചത്. മറ്റ് രണ്ട് പ്രതികള്ക്കായി പൊലീസ് തെരച്ചില് ഊര്ജിതമാക്കിയിരിക്കുകയാണ്. പോക്സോ വകുപ്പ് പ്രകാരം ഇവര്ക്കെതിരെ കേസ് രജിസ്റ്റര് ചെയ്തു.
Content Highlights: A 17-year-old girl has reported a sexual assault in Delhi’s Kalkaji area. According to her complaint, the incident occurred while she was sitting in a park with a male friend, when a group allegedly approached them claiming to be police officials. The complaint also alleges that the accused issued threats, and police have started an investigation.